प्लॅस्टिक सर्जरी

        प्लास्टिक सर्जरीमधील प्लास्टिक हे विशेषण मूळ ग्रीक शब्द ‘प्लास्टिकॉस’ या शब्दापासून आले आहे. त्याचा अर्थ घडवणे, आकार देणे किंवा पुनर्रचना करणे असा आहे. प्लास्टिक सर्जरी किंवा सुघटन शल्यचिकित्सा म्हणजे केवळ कॉस्मेटिक सर्जरी किंवा सौंदर्यवर्धक शल्यचिकित्सा नसून त्यात शरीरातील आनुवंशिक त्रुटी ठीक करणे, अपघाताने तुटलेली बोटे, हात, पाय जोडणे, कर्करोग झालेले अवयव काढून त्यांचे सुघटन करणे, भाजलेल्या रुग्णांवर उपचार करणे, त्वचारोपण, अवयवांचे बंद पडलेले काम पुन्हा सुरू करणे आणि त्यांचा आकार सुधारणे, दुर्बिणीद्वारे रक्तवाहिन्या आणि नसा जोडून शरीरातील एका भागातील त्वचा, मांस, हाड किंवा चरबी दुसऱ्या भागावर स्थलांतरित करणे इत्यादींचा समावेश असतो.